-
POEMA DE LA CONQUISTA DE PRIEGO POR ALFONSO XI
Interesante composición del siglo XIV de Yáñez, R.
YÁÑEZ, R.
(1348)
Pues Alcalá fue ganada
guisóse muy noblemiente
el buen rey con su mesnada
Priego çercó fieramente.
Grand priesa le fizo dar,
Priego bien se defendía;
Carcaboy mandó çercar
a la su caballería.
Pues que Priego fue çercada
moros ovieron manziella,
Carcaboy fue entregada
al noble rey de Castiella
que ovo muy grand plazer;
el noble rey con la su gente,
contra Dios fueron fazer
oraçión devotamente.
Todos grand plazar avían
e muy grand pesar paganos;
sobre Priego contendían
los varones castellanos.
A Priego priesa dieron
todos e muy grand guerra,
e una cava fezieron
muy alta por so la tierra.
Un falso enaziado
de la cava sopiera,
en la villa fue entrado,
a los moros lo dexiera.
Moros otra cavaron
bien de unas seys braçadas;
la del rey atajaron,
las cavas fueron juntadas.
Moros por allí salían
e cristianos a las vegadas
e so las cavas se ferían
a muy grandes asconadas.
So las cavas pelearon
todos con muy grand pordía,
e a los moros tajaron
siete cabeças un día.
Al rey las apresetaron
que estava en su tienda.
A Priego se allegavan,
dávanle muy gran contienda.
Los moros pesar ovieron
e todos muy grand manziella,
e pletesía fezieron
con el señor de Castiella
que les posiesen en salvo
con el aver que tenian,
el rey non preçió un clavo
quanto en el mundo avían
e quiso fazer su ruego:
los moros mandó salir.
Por la villa entró luego
e Priego fue recibir.
Allí moró muy poquillo,
e dixo a su priuado:
?Johan Alfonso Carriello,
de vos so muy pagado
e por que bos entiendo
lealtad bien verdadera,
Priego vos encomiendo
la llaue de la frontera?.
En Priego puso guarda
este noble cabdiello;
con su noble mesnada
çercó otro castiello.
2561 Veces visto -
|
